政情：河道活化進展慢 政府又畀嫻姐省

話說嫻姐尋日去到啟德河，同市民介紹歷史。原來啟德河過去係一條臭渠，及後地區上有保留同填平兩種意見，最終地區經一番游說先至予以保留，仲爭取易名為啟德河。嫻姐話由此可見，民間先係設施嘅最大用家，政府每次唔可以話唔做就闊佬懶理，起碼要成立專責小組同市民商討意見，先可以令設施真正「落到地」。

談及保育政策，嫻姐話並非反對政府發展，之不過保育問題亦不容忽視。佢舉例話黃大仙好多舊村、古物因為政府唔重視而受到損失，又話政府發展部分新蒲崗嘅工廈前，冇考慮裏面嘅藝術家，搞到地區方面好唔高興。雖則發展舊區係重要嘅事項，但若果漠視保育，就真係返唔到轉頭喇。