政情：難抵DQ壓力王卓雅青絲盡失

「頭髮係女人嘅第二張臉」，可見頭上一把青絲，對婦女而言係何等重要。向來以一頭長髮示人嘅西貢區前區議員王卓雅，尋日喺社交平台上載佢牛山濯濯嘅自拍照！到底佢受咗乜嘢刺激，搞到寸髮不留呢？

6月開始患「鬼剃頭」

原來王卓雅係患上俗稱「鬼剃頭」嘅病症。話說自從傳出區議員宣誓嘅消息，王嘅身體就每況愈下，6月開始發現頭上有一塊約5蚊銀大小嘅脫髮。去到7月，違誓追薪傳言所引發嘅區議員辭職潮，王一度猶豫是否離職，但最終都選擇冒住破產嘅風險「博一博」，繼續留任等待宣誓。然而一再推遲嘅宣誓日期，王所承受嘅精神壓力就喺佢把秀髮嗰度反應出嚟嘞。而最終，王都係過唔到宣誓嗰一關，上個月被政府褫奪議席。其後佢接受傳媒訪問，話遣散員工同結束議辦，令佢背負財政壓力。

雖然王卓雅並無交代自己張光頭相係幾時影，不過睇番舊相，過去甚少戴帽嘅佢，確係由6月開始戴帽喎。王又話自己退下火線後，一直重新思考未來嘅動向，之不過就要好好咁休息一段長時間咁話。