政情：區已完郭天立自己鬆拒爆行蹤

貼文「暫別」香港死撐非「流亡」

又有前區議員離開香港。月前曾嘲諷黨友「賣腸仔」嘅民主黨成員、九龍城前區議員郭天立，尋日向外界宣布基於個人原因，較早前已離開香港。之不過，郭天立話自己並非「流亡」，只係「暫時旅居海外」啫。之但係打算去邊度旅居呢？佢就無明確交代，只係話歸期不定。

郭天立喺社交平台貼文，話暫別香港係沉重嘅決定，然而離開咗，就係離開咗。而作為離開嘅人，無資格對留低嘅人指指點點，亦都無資格喺舊戰友身陷囹圄之際、以自由之軀講啲乜嘢。而無論係留低嘅香港人還是離散嘅香港人，誠願大家珍重，後會有期。雖然佢明言會暫別政治工作，遠離紛爭，但同時亦會好好裝備自己，繼續銘記香港人嘅身份，堅守自己嘅信念。相信終有一日，大家必定喺香港再次相見。

鬼打鬼嘲李華明賣腸仔

作為民主黨成員嘅郭天立，同黨內部分黨友並不咬弦。譬如早前就民主黨是否派人參選立法會換屆選舉嘅問題，佢就曾向資深黨友、前議員李華明隔空叫陣，駁斥李認為民主黨決定棄選，若不解散重組李都會退黨嘅言論，又嘲諷李自己又唔選，「咪推芝士腸、牛丸出嚟參選」，仲叫李安心養老「返去賣佢嘅喜得佳」。

郭天立其後又再批評李華明以退黨做情緒勒索，並藉住李自詡「從政多年都係市民選出嚟嘅、代表一定民意」嘅言論，鬧爆李嘅民意授權就算比佢高，但9年前李已卸任議員，所謂民意都係過去嘅事。反而佢嘅區議員任期就去到2023年年底，換言之，郭先至有資格代表民意喎。跟住郭又玩改圖，將一包急凍腸仔嘅名稱改為「肥仔明」，同埋將最佳食用期限改為2012年9月30日，嘲諷李嘅議員身份一早就過咗期啦。

被政府追數孭債走佬？

雖然郭天立嘅「抽水」大法，幾乎連太平洋都抽乾，但郭亦都保唔住議席，淪為「區已完」，兼且屋漏更逢連夜雨，被DQ後接獲民政事務總署來函，指其獲發還嘅累計營運開支償還款額，超出合資格領取嘅款項，預料需退還高達6位數嘅開支。到底「暫別」香港嘅郭天立，呢筆數找清未呢？