昔日東方政情：戰友仍踎監 郭榮鏗貼文刷存在感
舊年11月政府褫奪4位時任議員嘅議員資格，包括前公民黨成員郭榮鏗、郭家麒、楊岳橋、以及會計界梁繼昌。其後郭榮鏗宣布退出政壇，跟住就一家大細遠走加拿大。時光飛逝，尋日就係DQ4一周年喇，原來郭榮鏗仲記得呢日，喺社交平台貼文回顧事件，不過唔知道佢又記唔記得，當日4人到依家仲有兩位前黨友身陷囹圄呢？
身處加國 「紀念」DQ4一周年
郭榮鏗尋日喺社交平台回顧一年前DQ4嘅貼文，指一年過去，香港同埋香港人都經歷翻天覆地嘅改變。不過佢話「我們只能抱緊初心，念念不忘，必有回響」喎。
雖然話要抱緊初心、念念不忘，不過實情係郭榮鏗喺被DQ後無幾耐，就離開香港，遠走加拿大。而佢兩位黨友，楊岳橋同埋郭家麒就因為舊年民主派35+初選案，涉違《港區國安法》，目前正被還押，至今接近10個月。郭榮鏗嘅貼文，都有網民留言提醒佢，話好多「戰友」身陷牢獄超過半年。遠走高飛嘅郭榮鏗離岸貼文「紀念」，唔知係咪又想刷存在感呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
