政情：城大校長 郭位跟隊走人

城大副校長（發展及對外關係）李國安以大學發言人嘅名義發表簡短聲明，話郭位決定喺2023年5月卸任校長職務。佢又話該校亦根據校董會指示，成立遴選委員會進行國際招聘，以物色接任校長嘅人選。當在場記者追問郭位唔續約嘅原因，譬如係咪受壓，李國安冇回應就離開。

郭位係電子及能源可靠度專家，曾赴美國留學工作30幾年。佢由2008年起擔任城大校長，到依家已經10幾年喇，大學教育資助委員會主席唐家成就讚揚郭位積極推動城大喺創新、創業及研究方面嘅工作，尤其是城大設立首間動物醫學院，提供獸醫課程。之但係，郭位任內亦遇過唔少麻煩事，如2016年運動中心天花倒塌事件，而2019年嘅反對修訂《逃犯條例》風波肯定係極大嘅挑戰。儘管城大發生嘅暴力衝突，唔似得理大同中大咁嚴重，但城大校園仍遭入侵，校長辦公室受到惡意破壞，多處地方損毀。事後郭位聯同幾位副校長同秘書長等人聯署公告，譴責破壞行為，又揚言追究責任。

之不過，公告一出，郭位就遭到校內部分師生同埋校友批評佢「神隱」，跟住就有人將一首流行歌曲「二次創作」為《找郭位》並喺網絡散播，歌詞內容對郭位同城大極盡諷刺同奚落之能事，而城大都有學生跟住唱添，最終校方就揪出相關學生予以懲罰。

學生同校方關係變得緊張，郭位曾發表文章「解籤」，話好關心師生嘅安全同福祉，於是成立「緊急事故應變小組」向同學提供協調同支援嘅管道，但學生同外界嘅反應就似乎唔多收貨。雖然激烈嘅社會運動告一段落，但隨之而來嘅大學籌款，就令到郭位相當「頭痕」，早前佢曾向傳媒呻，話有商界人士認為校方縱容學生走上前線示威，託詞反悔原來嘅捐款承諾，甚至有人話想攞番捐贈嘅款項。另一方面，城大就連交換生都少咗，有部分就讀城大嘅非本地生，話唔想返港繼續學業。

到底郭位係咪眼見大學嘅棘手問題難以解決，而萌生去意呢？抑或佢有感已屆70歲高齡，想退下火線？咁就不得而知嘞！