憶校園「撞衫」尷尬事 還押李嘉達操肌雪恥

李嘉達憶述昔日就讀港大，每日都必須攀過數十級樓梯，氣喘如牛咁使用校園升降機。某日佢又係上氣唔接下氣咁步入升降機，點知隨後有一位男生闖入，李定眼一望，對方竟然同佢一樣，穿上某時裝品牌嘅黑白間條T恤，只不過呢位男生嘅身材較健碩，同埋唔會好似佢咁不斷喘氣囉！佢話起初都未覺得好尷尬，事關升降機內就只得佢同嗰位男生啫，點知本應關上嘅升降機門再次打開，跟住仲有兩位女生步入。其中一位女生目睹眼前兩位男生「撞衫」，不經意咁向健碩男生問咗一句「識（口架）？」而嗰位男生就露出尷尬但不失禮貌嘅笑容回答：「唔識（口架）。」

「撞衫」嘅尷尬，李話係在於佢同一個陌生人嘅選擇完全相同，而咁啱大家又同時出現喺同一地點。而當日佢喺升降機內覺得時間特別漫長，直到所有人都步出升降機，先至鬆一口氣。喺貼文文尾，佢仲特登加咗句，依家勤於「操肌」，希望一雪「港大升降機」事件之恥咁話。