昔日東方耳結石作怪 鄭景陽變大聲公
「講嘢大聲唔代表無禮貌」，之不過喺某啲情況下，講嘢大聲可能涉及身體狀況。話說觀塘前區議員鄭景陽，不時有人投訴佢講嘢嘅聲浪大，其後佢發現問題所在，原來同自己嘅嗓門無關，反而係對耳呀！
上載耳垢圖 驚嚇網民
鄭景陽尋日喺社交專頁貼文，話自己「剛洗完耳，粒耳結石勁大粒，難怪一直有同事投訴我講嘢大聲，應該係聽唔清楚。」到底佢係由幾時開始，發覺耳道被耳結石栓塞呢？呢方面佢就無交代喇！不過，佢就上載早前採耳所得嘅耳垢相片，惹來網民驚呼「點解呢啲核突嘢永遠係（喺）你身上發生？」亦有網民對耳結石深有體會，話自己都試過塞到聽唔到，結果洗耳之後就爽晒！
民協前主席、黃大仙前區議員施德來睇見鄭嘅貼文，就留言詢問鄭去邊度洗耳，同埋收費如何？鄭就話只係睇政府醫院嘅專科門診。施德來咁關心鄭嘅耳結石，莫非佢都畀人投訴話講嘢好大聲？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
