局長滿意度民調鄧炳強一枝獨秀蟬聯榜首

港府施政擾民屢遭批評，高官評分持續插水式下跌。有團體進行港府滿意度調查，結果特首林鄭月娥最新評分為1.91分，較上個月嘅調查再跌0.13分；而被嘲「避政司司長」嘅律政司司長鄭若驊，其民望持續「墊司底」，僅得1.81分，屬於3司13局高官之中最低分。至於上次調查，保安局局長鄧炳強成為最受市民滿意嘅局長，今次蟬聯榜首位置，獲評分為2.21分。

香港研究協會喺本月1至8日期間，就特首、司局長及特區政府嘅滿意度，訪問1,048名成年市民，當中1分為非常唔滿意，而5分就係非常滿意。調查結果顯示，特區政府9項施政表現嘅評分悉數錄得下跌，當中以「改善社會福利」嘅評分跌幅最勁，下跌0.22分至1.98分。至於評分最高嘅係「維護國家與香港利益」，錄得2.3分，評分最低係「紓緩房屋問題」嘅1.8分。協會又指，有關房屋政策評分已連續10次位居榜末，反映市民對政府處理房屋問題持續不滿。

鄭若驊續墊司底

至於特首林鄭月娥最新評分為1.91分，較10月調查跌0.13分。司長方面，評分最高係財政司司長陳茂波2.24分，其次就係政務司司長李家超2分，鄭若驊則繼續沉底，維持「包尾大幡」嘅位置。

至於局長方面，鄧炳強續居榜首，緊隨其後嘅係環境局局長黃錦星2.20分，第3位就係獲得2.13分嘅創新及科技局局長薛永恒。

協會指調查結果反映市民對港府嘅工作不感滿意，促港府認真反思施政不足之處，希望未來做得更好，回應公眾關注嘅民生訴求，以爭取更多市民嘅信任同支持咁話。