昔日東方政情：大球場降呢 貝鈞奇話做法合理
因2023年落成嘅啟德體育園有一個可容納5萬人嘅主場館，曾用作大型體育活動同音樂會場地嘅香港大球場將會「降呢」，將由目前4萬個座位大幅減至9,000個。體育專員楊德強尋日話，香港大球場於90年代重建至今，好多設施配套未能追上目前比賽需求，加上當局檢視後認為無需要再有另一個可容納4萬人嘅場地，因此大球場日後將改變定位，成為足球及田徑並存嘅體育設施，唔會用於音樂會用途。
開放跑道供市民使用
楊德強話昔日唔少學界比賽都喺大球場舉行，其後重建時清拆跑道，然而後來市民對田徑場地需求大，目前只得灣仔同將軍澳可進行正式比賽，希望未來大球場可以補足。譬如平日晚上冇賽事，大球場會開放跑道畀運動員訓練，一般市民亦可使用，大球場亦可舉行學界比賽。楊又補充話，當啟德體育園主場館落成及運作順暢後，料2024年開始改建大球場工程。
對於改建大球場，香港足球總會主席貝鈞奇認為做法合理，指除非有外隊或重要賽事，否則目前一啲較大型嘅本地賽事，入場觀眾一般只有6,000至7,000人。因此佢同意日後啟德體育園啟用後，大球場將改變用途。佢又指大球場改建後可提升現代化設施，包括藥檢、傳媒中心及多用途會議室等，日後亦可供學校或團體舉辦運動會。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
