政情：葵青區會 陳志榮零競爭當選副主席

除咗正在還押嘅主席梁錦威，所有葵青區議會嘅區議員都有出席會議。陳志榮話自從梁被還押後，區議會一直未能召開大會，唔少民生議題積壓，認為應先選出副主席主持會議以處理地區事務。佢話自己無黨派背景，比較能顧及各方意見同整體利益，相信因此而成功當選。佢又認為自己同民主派「有兩句」，未來亦會聆聽民主派意見，希望可以合作，為地區服務。

會議上亦討論到近日政府場所強制使用安心出行嘅問題，區議員郭芙蓉指安心出行對長者到街市買餸造成不便，建議政府派人到街市協助長者，或者派發靜態二維碼畀長者以紀錄行蹤。區議員林紹輝指，雖然65歲以上長者能豁免掃描安心出行，以填寫個人資料代替，惟不少長者「唔識字」，即使食環署派人協助長者，但身份難以核實，擔心會出現盜用資料嘅情況，批評措施令長者相當不滿。

葵青民政事務專員鄭健回應話，民政署會同食環署跟進北葵涌街市嘅情況，亦會考慮派人手協助65歲以上嘅長者填寫資料，鄭又指強制使用安心出行措施開展時間不長，政府正在檢討如何唔影響防疫嘅情況下減少市民嘅不便。