政情：區已完 靜靜雞離港遠走 郭子健英國蒲頭

一直未有透露去向嘅郭子健前日喺Fb貼文，話隨着議員辦事處今個星期正式結束，新嘅計劃隨之開始。佢話成立嘅新組織係為咗凝聚港人之餘，仲要繼續散播同增強當地人嘅拒共意識喎。佢話早前參加格拉斯哥全球氣候公義遊行，世界各地環團關注減排目標時，又提醒大家喺人權方面，中共屢次唔守承諾。佢又話所謂嘅海外戰線唔單止制裁中國，宣揚拒共理念係作為香港人身處自由世界嘅應有之義，真誠向每一個人傳達訊息。

對於突然離開香港，佢就為未能同街坊一一道別感抱歉，亦唔可以見證議辦最後嘅時光，願將來能夠同大家相聚。其實佢自7月就曾缺席區議會會議，喺9月更有消息傳出已離港，喺政府公布區議員宣誓安排後，佢亦表明唔會宣誓同辭職，最終被取消議席（DQ）。

其實喺近半年已經有多名前區議員默默離開香港，其中深水埗前區議員李文浩同劉家衡喺上任時聯合開設議員辦事處，但就喺上年因喺議辦外張貼「藍絲與狗不得內進」嘅告示，而惹起社會爭議。李上月先承認自己已抵英，但就有網民留言聲稱8月底就已經喺英國見到佢喇！有消息更指佢為貼告示惹起衝突一事，涉公職人員行為失當罪，正被有關部門調查。

另外，正被通緝前議員許智峯嘅「戰友」、中西區前區議員吳兆康喺辭職後，8月就上傳同家人喺英國嘅合照，唔少網民都係當時先知佢已離港。至於曾辦初選票站沙田前區議員丘文俊喺7月已辭職，佢喺本月初就透露自己已流亡英國倫敦3個月，仲話曾經諗唔通想過跳崖添啊！