政情：計學分即耍手 林卓廷拒獄中進修

日前林卓廷公開佢嘅獄中信，話自己喺監倉睇書好隨心，多數係會揀歷史或政治題材嘅書籍，若果棋癮發作就閱讀有關中國象棋殘局嘅讀物。林提到有親友鼓勵佢，既然未來在囚一段日子，不如進修一下，讀個碩士或專業課程，自我增值。

之不過，林卓廷話喜歡無拘無束咁追求知識，嫌嗰啲計學分、交功課嘅框框課程唔適合佢。自詡累積廿多年考試經驗嘅林話，向來都係秉持出七分力追求九分成績，認為要達到十分滿分，所花嘅精力係不合比例咁高，既然已經夠分數升學同畢業，又何必犧牲玩樂追求考第一呢？更何況「年年第一」亦唔等如「人中龍鳳」啊！相反，只有虛懷若谷、放眼四方，方可明白天外有天嘅智慧。林卓廷對讀書考試嘅見解，似乎另有所指咁喎。