政情：許智峯借暴大抽水畏罪遠颺鱷魚淚

貼文撐學生示威

反對修訂《逃犯條例》風波仍有餘波，曾經被稱為「暴大」嘅中文大學畢業生，日前趁舉行畢業典禮時示威。正被香港警方通緝嘅前民主黨議員許智峯竟然公開向有關畢業生「道謝」，讚揚佢哋為冷漠嘅儀式中添加一點人性，仲好似感同身受咁話自己最討厭虛假嘅官方儀式，但佢過往擔任議員時就經常把握機會喺各種莊嚴場合抗議。許昔日嘅議會同事都睇唔過眼，批評佢死性不改、一味抽水，兼且惡行連連，竟然拍拍屁股就走，簡直係無賴，應該返嚟香港與學生「同行」！

日前有中大畢業生，於畢業典禮期間高舉標語，上面印有因前年中大二號橋事件而被囚嘅中大學生名字，另外有紙牌印有「我們畢業了，但他們不能」嘅字句。學生舉起紙牌大約幾分鐘後散去，期間無人制止。同日亦有學生喺校內百萬大道展示印上「哀我中大」字樣嘅橫額，仲向在場人士派發白絲帶，其後有大約10名保安到場，以「未有向校方申請」為由要求學生收拾物品離開。最後校方派員同學生交涉，獲容許收起摺枱後，繼續展示橫額。

流亡澳洲嘅許智峯就喺社交網站分享貼文，話年輕人喺畢業禮舉標語、戴白絲帶，雖然只係好細規模嘅動員，卻召喚良知。佢提到自己擔任議員之時，最討厭虛假嘅官方儀式，因為負責致詞嘅嘉賓往往避重就輕，內容離地十萬丈遠，台下關心嘅社會公義、良知，統統唔講。佢仲如數家珍，自詡曾經喺禮賓府授勳儀式、十一酒會、法律年度開幕禮中示威，話每次都把握議員身份報名參加，直至後來所有類似活動都唔再邀請佢。

建制派斥實質拋低同路手足

建制派議員周浩鼎睇唔過眼，批評許智峯喺各大儀式上抗議，目的只為做騷抽水。周又指許智峯喺干犯罪行後，拒絕承擔責任潛逃外國，淪為過街老鼠以及外國勢力嘅棋子。周浩鼎仲話許智峯只係鍵盤戰士，顯示自己仍然好關心香港事務，實質上就拋低同路手足，簡直係食完飯要人幫佢埋單呀！

身兼中大校董嘅議員麥美娟就認為，好多學生喺反修例風波中被影響，特別受到許智峯之流嘅荼毒，直指許真係咁「愛惜」學生，應該返嚟香港並肩同行。

麥美娟又對於畢業生嘅示威行為感到惋惜，話唔應該藉莊嚴嘅畢業禮，將政治帶入校園。