政情：黃碧嬌議辦歸位 僅剩兩個月貨仔

開古！咪就係大埔區議會前主席黃碧嬌囉！佢喺廣福邨嘅議辦日前喺原位重開。事關佢嘅泛民對手、前區議員連桷璋辭咗職，議辦交番畀房屋署，而房署早前又攞番出嚟畀其他議員同區議員租用，而嬌姐就多得佢黨友議員租番呢個議辦，由於房署規定租約去到12月底，由依家開始計，只得兩個月貨仔。

重返議辦嘅嬌姐當然好開心，仲拍咗條片擺上網話畀班街坊知。佢喺短片中話好多舊傢俬都搬咗返嚟，例如一個書櫃，係佢喺2008年當選區議員後就放咗喺議辦，跟住仲有啲感慨咁話，選舉有贏有輸，2019年輸咗，亦估唔到依家議辦回歸。之後佢行去議辦外嘅街站途中，突然發現地下有好多雀屎，即刻拉住管理處嘅人員問點解，原來係因為白鴿聚居搞成咁，即刻要求管業處加強清潔。

2019年區議會選舉擊敗嬌姐嘅連桷璋，今年5月初喺社交平台公布辭去區議員職務，而早前因與大埔區議員姚鈞豪及前區議員文念志等人，涉嫌喺舊年3月挑釁同用雷射筆照便衣警員，被控參與非法集結、無牌管有無線通訊器具及襲警等罪，連桷璋被裁定罪名不成立，而姚同文則被判監3個月，兩人已刑滿出獄。