政情：泛民散沙臨陣倒戈失主席位自食其果

屯門區會建制成功「偷雞」

屯門區議會前主席陳樹英今年7月辭職，為填補其懸空職位，該區議會曾兩次開會補選但都以流會告終，可謂波折重重！點知尋日再度開會選舉新主席時，喺有區議員缺席及懷疑有人倒戈嘅情況下，建制派工會代表陳有海，同原本佔上風嘅民協甄紹南喺兩輪投票中，同取相同票數，最終陳喺抽籤環節中險勝當選為主席。

喺早前嘅區議員離職潮中，屯門區議會有17人先後辭任，包括陳樹英。該區議會分別喺7月底同9月中舉行會議補選新任主席，但兩次都因法定人數不足而流會，拖延至尋日會議先再補選。至於有意競逐主席之位者，日前有傳係甄紹南、民主派嘅江鳳儀，以及陳有海3人。按目前屯門區議會11位區議員當中，民主派佔7人，數數手指都知建制派屈居下風，但倘若民主派唔團結的話，建制派或有漁人得利嘅機會。而喺會議開始前，秘書就話江不適缺席，泛民只剩6人，建制就有4人。

陳有海抽籤險勝甄紹南

之但係萬萬估唔到，陳及甄喺兩輪投票中都各取5票，好明顯就係有民主派做叛將。最終喺抽籤程序中，陳手氣唔錯，抽出較大號碼而當選。陳當選後發言時話，希望區議會可撥亂反正、踏上正途，期望同事日後加強合作，做好屯門民生工作喎。

至於甄紹南就話今次敗選，未能代表民主派奪回區議會主導權。佢又話補選前已進行唔少拉票工作，同埋闡述上任後政綱，當時大部分人即時口頭答應支持，睇牌面應有足夠票數勝出，但遺憾尋日有議員不適缺席，佢更懷疑有人陣前倒戈啊。

補選主席塵埃落定，有份出席會議嘅屯門區議員、民主黨前成員林頌鎧就話唔評論選舉結果，而副主席黃丹晴則坦言對結果感遺憾。對於最近3次大會均有區議員不適缺席，佢惟有着大家小心身體，唔希望有人意氣用事，影響整體格局。今次民主派又因未能協調，加上有人倒戈而白白將主席之位拱手相讓。