政情：企硬唔交民陣文件 陳皓桓認衰罰$8000

陳皓桓尋日開庭無聘請律師代表，形容案件係政治事件，而唔係「法律嘢」，又話自己喺囚室用咗半個鐘寫好求情信。求情信指民陣19年嚟都同警方保持合作，被警方稱為「合作夥伴」，有前特首更形容民陣為「朋友」。佢指直到收到警方信件先知道原來民陣無註冊，但因為前主事人無留低紀錄，所以先答唔到警方問題喎。

佢話自己作為民陣召集人，願意一力承擔刑責，但就唔明點解警方唔向民陣創辦人查問，仲要一直同無註冊嘅社團合作，但又無作出提醒，直至19年後先起訴佢喎。佢答辯時仲話「匹夫無罪，懷璧其罪。我既然懷璧，我認罪」。

民陣喺2002年成立，為超過50個民間組織提供平台，2006年曾經向警方註冊成為社團，兩個月後告知警方已解散並取消註冊，但其實仍然活躍於組織公眾集會及遊行，更會定期更新社交媒體，招攬公眾支持。警方喺今年4月21日向陳，同埋前民陣副召集人黎恩灝發書面通知，要求佢哋5月5日或之前向警方提交資料，解釋點解2006年之後無註冊為社團、詳列2006年9月後舉辦嘅遊行集會詳情、公開民陣嘅收入來源、開支、銀行戶口等，陳5月4日回覆警方指唔會回答通知列出嘅問題。

裁判官就話呢項控罪針對被告無交資料，同民陣嘅宗旨或目的無關，而民陣喺多年來有相當程度活動，無交資料會令警方工作延誤，故以罰款1.2萬元為量刑起點，考慮到陳認罪，最終判罰款港幣8,000元。

老實講，呢件事拖拉咗近半年，咪以為可以心存僥倖，拖拖下就會不了了之，依家陳皓桓都係要找數，接受法律刑責。查實佢因涉及多宗非法集結案件，依家於石壁監獄服刑。佢上個月26日喺東區法院承認參與2019年9月15日嘅港島區非法遊行，被裁判官鄧少雄判處監禁3個月，當中兩個月同其他案件嘅刑期同期執行，陳因此需加監一個月，連同早前其他案件嘅刑期，共判囚22個月啊。