政情：蔡俊彥寧可先劍擊後學業

由小學四年級開始接觸劍擊嘅Ryan，中學入讀喇沙書院並加入劍擊隊。尋日佢應邀出席母校嘅舊生運動示範日，喺分享環節中，Ryan話自己升讀大學之後，曾打算先畢業再轉全職，但後來改變主意，於2018年轉為全職運動員，先放低大學課程，專注劍擊，之後再重返校園完成大學課程。被問到未來目標，Ryan表示短期內希望喺亞運會有衝擊獎牌嘅好成績，長遠就希望3年後嘅巴黎奧運會贏取獎牌送畀大家。

講起體育操練，當然要有適合嘅場地啦。出席同一場合嘅喇沙書院舊生會前會長李宗德話，留意到康體設施需求殷切，但係有人乘機「炒場」圖利，佢希望有關當局能注視問題，冀康文署能以新方法去杜絕「炒場黨」。