政情：陳諾恒議辦開門失竊 一度痛失救命錢

陳諾恒喺秦石邨嘅辦事處，今日必須清場，正式交還番畀房屋署。日前佢就透過社交專頁，話辦事處裏面仲有一啲物資，包括櫃、書枱、文具、小量電器、口罩及其他物資可以送出，歡迎街坊喺本周四、五兩日入去辦事處慢慢揀，總之啱用就攞啦。後來佢喺社交專頁貼文話有11.5萬現金，同埋兩部手提電腦唔見咗，強調呢筆錢係佢嘅全部，「筆錢要嚟救命」，希望攞咗嘅人可以交番失款同電腦畀佢。

陳諾恒接受本報查詢時，指尋日辦事處人流頗多，難以一眼關七。當發現失竊之後，懷疑有人摷過佢個背囊，見到內有現金就拎走咗。佢話本來都好信任街坊，認為過去自己付出咁多，唔應該發生呢啲不愉快嘅事。佢重申呢筆現金本來係用嚟出糧，不幸遇竊就要由自己嘅生活費用先行墊支，當然會對日常生活構成影響啦，好慘呀！

雖然已經報警，但陳話翻查閉路電視之後已發現涉事者。佢呼籲涉事者同佢聯絡，若果尋晚9點前交還失款同電腦的話就保證不予追究，當冇事發生過，否則警方到辦事處掃指模同埋發出通緝嘅話，就可能冇轉彎餘地。

最終，陳諾恒發出交還失款呼籲後3小時，佢嘅財物喺限期前失而復得，都算係大團圓結局啦。