政情：冇球場踢波招怨 民政局官腔遊花園

徐英偉指政府會加速新設施嘅規劃進度，但按《香港規劃標準與準則》而言，康文署欠缺11.8個體育館、12.9個11人足球場等，已經委派顧問研究市民習慣以新增不同體育設施。對於體育及康樂設施5年計劃，佢話26個項目中，21個已經獲得立法會撥款、涉款約77億元，當中7個項目將於今年內開放、9個已經展開工程、5個將於今年內動工。

之不過，議員陳沛然就話政府統計係按全港人口計算社區欠缺幾多球場，實際上多區未有足夠設施，質疑政府會否喺「明日大嶼」新建15個足球場就當解決問題，認為場地設施應該分區計算。

此外，鑑於廣東、香港、澳門將承辦2025年第15屆全國運動會（全運會）。有議員關注啟德體育園如何配合全運會賽事，以及香港體育學院嘅翻新工程等。徐英偉就預料啟德體育園將於2023年中落成，有充足時間承接全運會賽事；至於體院新設施大樓地盤同訓練場地有一定距離，加上增設靜音設施，將確保興建工程唔會影響體院訓練咁話。