政情：近半建制議員評分跌蔣麗芸包尾

儘管民主派喺議會已不成氣候。但最新民調結果顯示，19名地區直選同俗稱「超級區議會」功能界別嘅建制派議員中，近半評分下跌，而民建聯港島區直選嘅張國鈞同九龍西直選嘅蔣麗芸（Ann），所得評分排喺尾二同包尾添！反映市民對大部分議員嘅表現未感滿意。

香港研究協會喺本月13日至25日成功訪問1,269名18歲以上嘅市民，評分以1分最低至5分最高。結果顯示，喺5個直選選區同「超級區議會」功能界別共19名建制派議員，當中9人嘅評分下跌，而阿Ann嘅評分較上次下跌0.33分，僅得1.82分，係咁多個議員當中評分最低嘅一個。而佢嘅黨友、港島區直選嘅張國鈞亦唔好得去邊，評分只有1.91分，喺當區排包尾位置，以19名議員計，佢排尾二。

蔣：評分有高有低係正常

其實，喺阿Ann所屬嘅九龍西同張國鈞所屬嘅港島區，全部議員嘅評分都下跌，譬如九龍西嘅梁美芬同Ann嘅黨友鄭泳舜，評分分別跌至2.16同2.09，而港島區嘅葉劉淑儀亦微跌至2.24，郭偉强就跌至1.96；而新界東嘅3名議員葛珮帆、容海恩同陳克勤嘅評分都有下跌，分別係2.21、2.10同2.02分。

阿Ann回覆本報查詢，話自己都曾經上過民調較高名次，認為評分有高有低係正常，可能同問卷調查樣本唔同有關，佢強調不論評分高低，身為議員都要盡力工作。