政情：立會通過告別議案梁君彥感言：5年來驚濤駭浪

尋日係今屆立法會最後一次大會，通過告別議案時主席梁君彥分享感言，指過去5年議會經歷驚濤駭浪，疫情更加係雪上加霜，不過議會最後都重新出發，而本屆立法會延任一年間通過46項法案，比之前多出一倍以上，例如《2018年廢物處置（都市固體廢物收費）（修訂）條例草案》及《2019年吸煙（公眾衞生）（修訂）條例草案》等極具爭議嘅議案都獲得通過，而本屆需要審議嘅法案都已經完成審議，毋須拖到29日午夜咁話。

梁君彥又感謝秘書處，指立法會保安受盡屈辱都盡忠職守。佢最後叫議員一齊影張大合照，但礙於防疫關係就唔好除低口罩，用眼睛表露笑容就得喇。紡織及製衣界議員鍾國斌，就話梁君彥做主席絕唔容易，先前無奈聽泛民講廢話，未選出內會主席前一個人坐喺到，唔去食飯、唔去廁所，話梁木口木面實在可以理解，希望佢可以笑番吓，鍾又問梁會唔會再選，再選嘅話會再支持梁做主席喎。

議員葛珮帆（EQ）指今次任期內，面對言語及肢體暴力，議會生態一度變得畸形。佢又話近年提倡嘅政策包括成立創科局、立法禁偷拍、打擊「假難民」等亦成功落實，期望下屆議會及政府繼續為市民服務。喺告別動議上，亦有建制派議員都大吐苦水，指關鍵議題上以支持港府為大前提，再加上種種因素下，建制派爭取民心工作上遇唔少困難，可謂「有辱無榮」。

壽星仔謝偉銓由朝忙到晚

尋日唔止係立法會大會煞科，仲係建築、測量、都市規劃及園境界議員謝偉銓（Tony）嘅生日。雖然係壽星仔，但Tony由朝忙到晚，一直都唔得閒慶祝，好彩議辦同事為佢準備咗生日蛋糕。雖然議員嘅年齡唔係乜嘢秘密，但佢喺社交平台嘅貼文就同大家賣個關子，話尋日係自己50歲+200幾個月嘅生日喎，想知佢今年貴庚就真係要動下腦筋計一計數啦！至於生日願望，就係香港繁榮穩定、市民安居樂業、兩地早日通關。Tony話生日願望係好老土，但愈老土嘅願望先至愈難做到，惟有繼續努力喇！

此外，議員梁美芬就派柑，點解要同大家分享呢一種水果呢？梁就解釋，今屆立法會任期苦盡甘來，所以就想派柑，諗住同大家分「柑」同味喎。