政情：財會總結 官員官腔惹人厭 波哥寄語：錯就要認

波哥話今個會期財委會運作暢順，所批准項目屬本屆立法會最多，所涉及嘅承擔額合共約3,278億元，撇除上個會期及本會期批准嘅防疫基金緊急撥款作比較，係本屆立法會最高。

講到會議效率方面，波哥就話今個會期審議一個項目平均只需要約46分鐘，遠較上個會期平均用2小時24分鐘為少。對於財委會修改程序後被指淪為「提款機」，波哥就舉例指以往最多半小時就可處理嘅公務員加薪議程，舊年就用咗逾20小時。佢話唔可以用會議時間長短，嚟推論財委會並無認真審議撥款申請。

官員喺立法會上嘅回應經常捱批，波哥曾批評官員喺財委會會議上，只係機械式咁重複政府立場。就官員今年表現，佢就認為整體表現有進步，但仍有唔少改善空間，仲話有人冇太大進步呀！佢話官員倘遇到困難，應尋求在席同事協助，強調呢個唔係面子問題。

至於被問到擔任財委會主席5年來有咩感受，佢就話苦盡甘來、恍如隔世。同埋話最差嘅情況係試過連續多日召開會議，選舉主席時，更要默默忍受指罵，實在無諗過依家會議可暢順舉行。

到底波哥有無打算連任呢？波哥就話如果參選而又當選，屆時就交由其他議員決定喇。仲話做咗財委會主席幾年，若果議會同香港需要佢，都樂意競逐呢個位。喺波哥旁邊嘅副主席陳振英就話財委會職能重要，應由有經驗及公信力嘅議員出任主席，如果波哥有意連任，相信大家都會支持喎。波哥聽到之後就同對方互笠高帽，大讚陳振英心思縝密，認為佢都係財委會主席嘅適當人選啊！之但係下屆議會將有一批新血加入，睇怕都好考主席主持會議嘅功力啦。