政情：沈豪傑勢重掌元朗區議會

區議員宣誓已告一段落，但多區正副主席懸空，令轄下的委員會及工作小組出現停擺。元朗區議會都唔敢怠慢，今日就會補選番主席，取代被DQ嘅民主黨黃偉賢。邊個會補上？有說沈豪傑嘅呼聲最高，亦相信冇競爭。我哋問過佢，佢話已經向秘書處遞咗競逐主席嘅表格，若果真係當選主席，佢希望區議會增加增選委員，尤其係年輕人，等佢哋參加區議會轄下各委員會會議，令到區議會多啲唔同嘅聲音。

佢仲話現有多個委員會嘅工作範疇明顯係超越區議會嘅職權範圍，初步諗住「大執」啲委員會同工作小組，由8個減少至4個委員會，包括社區事務委員會同埋交通及運輸委員會等，希望能夠成事！至於副主席已經喺8月補選，當時泛民主派有3人投棄權同無效選票，最終令身兼錦田鄉事委員會主席、鄉事派當然議員鄧賀年擊敗泛民嘅陳詩雅當選。