政情：梁君彥借姜濤歌曲立會惜別晚宴吐苦水

立法會今屆任期即將結束，主席梁君彥尋日喺立會舉行惜別晚宴，宴請特首、3名司長，各問責官員、行政會議成員及一眾議員。佢仲以「甜酸苦辣」嚟形容5年嘅會期，感嘆主席唔易做啊！

佢話立會近5年經歷唔少苦頭，曾經被示威者包圍衝擊，又有議員拉布、破壞議事秩序。佢又形容行政立法關係在前4年係「勁辣」，會上多次針鋒相對，而前年嘅《施政報告》更唔能夠喺立法會上宣讀。

多災多難今屆未曾齊人

跟住講到自己，佢引述有人曾經講過主席係最孤獨、最辛酸嘅，而自己面對歷來規程問題最多、秩序最混亂、衝擊最激烈嘅立會，而呢屆議會更從未試過齊整70人，有議員被取消資格，又有議員集體辭職，令佢不禁感嘆呢一屆主席真係唔易做。但佢都認為總能面對嘅，更引用姜濤嘅流行曲《蒙著嘴說愛你》中的歌詞「天給我磨練也好，我未敢辜負」。佢又話「食得鹹魚抵得渴」，無論官員定議員都同樣身處「熱廚房」，會被人批評、辱罵，但相信只要虛心聆聽，接受批評，就能將好嘅政策落實到位喎。

工程界議員盧偉國仲即場用琵琶彈奏《十面埋伏》同埋《獅子山下》，仲講吓呢5年嘅感受。喺晚宴前，一眾議員影大合照同切燒豬，醫學界議員陳沛然無出席，其中議員石禮謙、馬逢國同埋容海恩更玩自拍添！