政情：人才流失港崩潰？ 吳克儉：留低仲多機會

吳克儉話有人擔心香港人才唔夠，事關有人移民走咗，不過佢就引述某官員早前嘅說話，指過去一段時間香港人口其實係有增長。而就算人走咗，都會回流返嚟，點解咁有信心？佢就話有大學所做嘅調查，指今年嘅人才競爭力指數2021，香港嘅人才排名全球係排頭20，以亞洲嚟講係第二位！佢話咁都未夠威水喎，譬如簡稱IB嘅國際文憑大學預科課程，舊年攞滿分有23位同學，今年仲厲害，有130人，佔全球約11%。而全球IB成績頭100間學校，香港就有19間，其中有4間更排頭十位！可見香港並非人才唔夠，只不過係機遇唔夠啫。

吳克儉又話，過往工程學系嘅大學排名主要來自歐美，但最新嘅排名，全球第一位係清華大學。佢認為種種指標都反映世界在逆轉中，所以就算人走咗都會回流返嚟，就好似上次嘅移民潮一樣，而留低嘅人發覺機會多咗，做嘢自然更加醒目。

不過吳克儉亦不忘補充一句，話以前港人經常覺得香港好叻、好醒，但當其他地區不斷發展，先至發覺唔同嘅地區有唔同嘅人才、有唔同嘅強項，所以港人都應該同其他地區嘅人才互相學習，而無話你叻晒、我輸晒咁囉。