昔日東方政情：林正財講減排 追趕零碳潮流 加電費 焗承受
為減緩全球暖化嘅趨勢，近年國際間興起一股減碳潮流，香港亦唔例外，早前港府就制訂《香港氣候行動藍圖2050》，冀於本世紀中葉實現碳中和目標。之不過，要達到目標就要付出代價，可持續發展委員會主席林正財尋日喺一個電台節目中，提到期望香港未來嘅新發展地帶，好似「北部都會區」可以結合零碳運輸，但欠缺自然條件嘅香港，若轉用零碳能源發電必須付出相當成本，換言之，佢向大家預告電費上調，實在無可避免。
林正財話本港嘅廢棄物、交通運輸同埋發電，三者共佔全港碳排放總量達九成以上。若善用更多轉廢為能設施處理廢棄物、將運輸工具電動化、同埋逐步轉用零碳能源發電，就可減去絕大部分嘅本地碳排放。
零碳能源基建 港缺地發展
林續指，鑑於發電佔本港碳排放約三分之二，係最大嘅碳排放源，因此要實現碳中和，關鍵係零碳能源發電。
所謂零碳能源發電，不外乎開發水力、地熱、風力等，十分仰賴土地資源同科技嘅支援，亦要投入大量資本興建用以生產、接收同儲存零碳能源嘅基建設施。但香港並冇呢啲天然條件，亦較其他地方缺乏空間資源嚟發展龐大嘅太陽能或風能等可再生能源發電場。因此，要喺香港利用零碳能源發電，必須探討從其他地方輸入零碳能源，或參與境外低碳及零碳能源嘅開發同投資項目。咁就無可避免會增加電力嘅成本。
林正財又話基於種種原因，全球嘅能源價格正在攀升，再加上內地同周邊地區亦都力爭實現碳中和，對零碳能源嘅需求甚殷，故此大家都要面對電費上調嘅壓力，社會各界亦必須共同承擔減碳嘅代價！
減碳冇新意 叫市民多步行
既然林正財講到明，深度減碳成本不菲，小巿民應該點做至好呢？佢嘅答案可謂了無新意：慳電。講來講去都係使用較節能嘅電器、多啲使用公共交通工具、同埋養成良好慳電習慣。佢又建議巿民多步行，或以單車代步，以實踐「綠色出行」。不過香港正邁向人口老齡化，到底一眾「老友記」有咁幾支持多步行，或者以單車代步？咁就要身兼安老事務委員會主席嘅林正財去了解一下喇。
本文連結 : https://orientaldaily.on.cc/content/要聞港聞/odn-20211024-1024_00176_401/政情：林正財講減排--追趕零碳潮流--加電費--焗承受
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
