政情：區會染黑其罪當誅市民寧用公帑捉老鼠

今屆區議會原本由泛民主派主導，當中亂象頻生，隨住區議員離職潮，政府建議收回區議會喺社區參與計劃以及地區小型工程計劃嘅撥款權。立法會財務委員會尋日通過對整體撥款範圍進行技術性修訂，配合地區小型工程計劃嘅撥款權轉移。有議員直指喺黑暴區議員把持下，只談政治、不談民生，甚至有市民認為應該取消區議會制度，慳番啲公帑捉老鼠仲好！

立會通過收回撥款權

議員梁美芬批評部分泛民主派區議員唔敢宣誓，「擒擒青」辭職，明顯心中有鬼，落得今日嘅下場係與人無尤。佢重提去年時任警務處處長嘅鄧炳強到區議會赴會但不受歡迎，扭曲嘅氣氛令官員難以落區。議員謝偉銓同樣支持收回撥款權，話區議會早已失效，難怪市民認為應該取消制度，慳番啲公帑清潔街道、捉多啲老鼠、種多啲樹，都好過咁樣嘥。佢又批評原本區議會協助推行地區小型工程，反而變成阻礙建設，同時影響建造業界經營。

另外，議員葛珮帆認為地區小型工程進度一向緩慢，即使規模細，顧問研究費一樣好貴，佢關注日後由政府負責提議進行工程項目，應該完善規劃，例如整合一個地區一併設計、加裝設施，帶嚟更好嘅成本效益，而唔係用幾百萬加設一張櫈，令人覺得政府做咩都係貴。

民政事務局副局長陳積志回應話，政府一直追求實用、人性化嘅建設，不過以往區議員眼光較窄，只着眼自己嘅選區，認為葛珮帆嘅提議唔錯，政府可以發揮協同效應，一併設計區內唔同位置嘅扶手、櫈等。佢亦批評區議會喺反對派嘅把持下基本失效，唔單止沒有倡議推展項目，甚至阻撓項目，認為日後加強諮詢分區、防火、滅罪委員會等更加直接、暢順，走少區議會程序後有信心可以加快工程。

至於財委會主席陳健波報告尋日係本屆最後一次嘅財委會會議，已經完成審核所有政府提交嘅建議，喺今年度共批出120個項目，涉及嘅承擔額超過3,200億元。