政情：針對流感議員親身上陣陳恒鑌驚到震

天氣漸轉秋涼，又係慎防流感嘅時候。尋日立法會就有32名議員報名接種季節性流感疫苗，主席梁君彥話香港即將進入流感季節，然而新冠肺炎病毒威脅未除，為咗避免流感同新冠肺炎疫情一齊夾擊，多名議員帶頭打針，冀市民亦跟隨接種季節性流感疫苗。在場一眾議員本來打算齊叫「齊抗流感」、「接種流感疫苗」等口號，不過無人率領之下，嗌到非常唔齊整啊！

不過一講起打針，點都會有怕針拮嘅人。只見議員陳恒鑌除咗西裝外套同埋恤衫，着住一件白色貼身T-Shirt準備打針，雖然準備妥當，又有食物及衞生局局長陳肇始同埋副局長徐德義一齊傍住，但打針時佢緊閉雙目，狀甚痛苦，唔知係咪都驚打針呢？眾所周知，陳肇始曾三度跌傷手，陳恒鑌仲問佢隻手好番未？陳肇始就答話好番啦！

何俊賢陳肇始鬥扮示威

為咗方便打針，除陳恒鑌着白色貼身T-Shirt外，仲有其他方法嘅，議員馬逢國同埋黃定光（象哥）就索性着短袖衫，外邊套件西裝褸，除都容易啲。但都唔夠田北辰激，佢將恤衫除下，露出一件白色背心底衫，仲要向住陳肇始除衫啊！而議員容海恩喺接種疫苗前除咗外套，以粉紅小背心上陣。

去到差唔多打完針，何俊賢就突然模仿示威者請願，對住副局長徐德義大叫「強烈要求特區政府擊退流感」，陳肇始見狀，又學佢一樣叫口號，高呼「兩種疫苗同樣重要」、「議員支持打針」等，陳仲講笑話自己有潛質搞示威添！

陳肇始話雖然本地新冠肺炎疫情穩定，但隨着冬天來臨，不單止出現流感，新冠嘅變種病毒亦會較活躍。佢話現時老人家接種率仍偏低，強調政府採購咗約90萬針疫苗，儲備充足，而新冠疫苗同流感疫苗相隔14日就可以接種，呼籲市民踴躍接種。