政情：上月被政府DQ 梁柏堅：頹咗成個禮拜

梁柏堅話世界轉得太快，大家可能唔多感覺到，但其實佢被政府DQ後，頹廢咗成個禮拜唔出門、唔上社交網站，試過打機試過飲酒、睇完兩本書都只係過咗6日，要躺平又唔勞氣嘅生活好似有啲挑戰。至於頹廢咗一個禮拜之後有無重新振作呢？梁話似乎談不上，惟有去探監、籌備物資、行山、露營、睇書樣樣都做啲，只不過一得閒，又會入番去個黑洞自我對話。

梁又話被DQ後有好多嘢要處理，而自己嘅區議員辦事處喺上個禮拜正式交吉，但只係完成一個階段，事關唔計營運開支，上個月有半個月嘅人工，政府都仲未畀，以致佢要開口問人攞錢，以支付助理嘅遣散費，同埋結束辦事處嘅開支，大呻話呢啲經驗，真係有今生無來世。

面對人生挫折，梁話曾邀約一眾前助理，喺一個風和日麗嘅日子划獨木舟。佢話望吓大自然、搵人出嚟圍爐確實可轉換吓心情。但一講到未來5年無得參選，老本行又有機會做唔番，咁就梗係愁啦。但梁話無論如何，都唔想大家一齊絕望咁話。