政情：政府廣告 飲酒致癌 邵家輝質疑誇大 「不如話會死啦」

喺尋日朝早舉行嘅立法會公務員及資助機構員工事務委員會政策簡報會上，邵家輝話有業界向佢反映，指港鐵車廂內有政府廣告大大隻字標明「酒致癌」，但就無列明係引致邊一種癌症喎。邵質疑呢一則廣告係矯枉過正，佢認為每個市民嘅生活都有選擇嘅自由，政府宣傳上唔應該誇大其詞，更鬧爆政府「不如你話飲酒會死啦，唉！」

公務員事務局局長聶德權就回應話，政府發放訊息時，能否符合事實係有一個重要嘅原則，所以有時政府發放訊息緩慢，其中一個原因係政府絕對唔可以出錯。

對於港鐵上嘅廣告，佢就話相信每個政策局所發布嘅宣傳訊息，都係有事實根據嘅，又強調每樣事情都有唔同角度，例如站喺公共衞生嘅角度，當然係希望市民最好滴酒不沾啦，但市民喺社交場合適量飲酒，當然無問題咁話。