政情：學齡人口下跌 張宇人：大刀闊斧殺校

議員張宇人喺會上話小班教學唔一定對學生有好處，佢認為教育局應要大刀闊斧殺校，而唔係縮減每班人數保住教師嘅教席，「希望你平衡番我哋納稅人使嘅錢……千祈唔好保先生（教師）飯碗就不停減少學生，等啲先生不思進取，去胡混、誤人子弟。」佢又關注教師專業操守問題，指局方應檢視教師註冊制度，要求教師須定期續牌。

楊潤雄就回應話依家嘅小班教學政策係從教學利益同學理出發，唔係用嚟處理人口下降，又話局方亦會參考海外經驗等，檢視係咪維持現有教師永久註冊安排。佢仲話，期望最快下年公布有關教師專業操守嘅指引同示例。

另一議員張國鈞就關注日後若有學校因學齡人口下降停辦，局方會點樣處理空置校舍。楊潤雄就話會同辦學團體商討邊啲學校需要停辦，若果能夠及早作出決定，局方可以盡快交由其他政府部門考慮相關土地嘅未來用途。