要聞港聞

政情:胡健民出任政制局副局長

胡健民話出任新職,唔係視乎任期長短。 胡健民話出任新職,唔係視乎任期長短。
胡健民話出任新職,唔係視乎任期長短。
任期僅8個半月
政制及內地事務局前副局長陳帥夫今年初因為健康理由請辭後,相關職位一直懸空。雖然本屆政府只剩低8個半月嘅時間,但政府尋日宣布,委任大埔前區議員胡健民為新任副局長,胡將於聽日履新。胡回覆查詢時話工作唔係視乎任期長短嘅,都係服務市民啫,佢希望上任後幫到政制及內地事務局局長曾國衞,分擔工作,又話未來雖然有兩場重大選舉,但都唔會怕嘅,反而仲幾期待未來嘅工作喎。
今年2月,陳帥夫透露有高血壓家族史,即使服藥亦未能有效控制血壓,為顧及身體同埋家人,故惟有請辭,強調請辭決定同現時嘅政治氣候無關,亦無打算移民及有其他「路數」,而自從陳帥夫辭任政制局副局長後,有關職位一直懸空,雖然當時都知政府任期所餘無幾,但有傳政府仍然積極物色人選接替副局長一職。
話期待兩場重大選舉工作
喺人選方面,政圈曾先後傳出,副局長一職可能會由胡健民嘅黨友、議員鄭泳舜接任,但據聞因為現屆立法會工作繁重,唔適宜再抽走議員,最後先無疾而終。去到今年5月,又再有消息傳出會由該黨嘅副秘書長、油尖旺區議會前主席葉傲冬出任該局副局長,仲聽聞相關程序已經進入最後階段(口架)喇,但臨門一腳失落位置,而葉傲冬7月初時更向傳媒透露自己將轉投商界發展。
直到今年7月有傳媒披露,政府已初步擬定胡健民為接任人選,但只係消息流傳,事隔3個多月,政府尋日先正式公布。雖然胡在任時間唔長,但未來面對立法會換屆選舉同行政長官選舉,加上政制及內地事務局範疇廣泛,喺搞「重頭戲」選舉外,仲有修訂私隱條例同反歧視法等事宜,亦有責任推動《基本法》同憲法教育,睇怕都係一份辛苦工。
胡健民回覆查詢時,話任期長短唔緊要,無論做咩角色都好,其實都係服務緊市民。佢又話上任後希望幫到局長曾國衞,分擔工作,以及同其他公務員合作。佢又話未來雖然有兩場重大選舉,係局方嘅重要工作,但都唔會怕嘅,反而仲幾期待未來嘅工作喎。
胡健民今年54歲,曾經做過輔警總督察,係民建聯成員。胡於2016年至2019年期間擔任大埔區議員,2019年未能連任,但今年4月大埔新增分區委員會,胡就獲政府委任加入大埔南分區委員會喇!
胡健民曾經做過輔警。胡健民曾經做過輔警。
胡健民曾經做過輔警。
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500