要聞港聞

黃絲公僕須整治 弊在高官冇擔當

任何一個高效政府,都要有好嘅團隊。節頹俗敗,紀綱散亂,古人認為係在上嘅未能「慎選左右」。用今日嘅話,就係用人必須「能者居之」,說得再淺白些,就係善於作為,勇於擔當;平常之時,恪盡職守,非常之時,甘於奉獻。
各位,講就易,真正實踐起來又係另一回事。呢,好似香港啲公僕,黃絲充斥,宣誓效忠都大把人當食生菜,捧住個鐵飯碗,咁嘅時勢,趕都唔走喇;至於薪高權重嘅高官,講到「才德兼備」又要「敢於擔當」,真正做到嘅,又有幾人?
新一份《施政報告》建議檢視公務員高層職位選拔聘任機制,確保「有能力者居之」。嗱!公務員事務局局長聶德權尋日喺電台節目侃侃而談,指本港過去兩年經歷反修例風波和紛爭,政府施政舉步維艱,批評社會有人為反對而反對和泛政治化,最終要中央出手落實國安大法和修改選舉制度。呢啲都係肺腑之言!
公務員官僚僵化,普遍養成「事不關己,高高掛起」嘅陋習,多做多錯、少做少錯深入官場,部門互相推搪塞責常見。呢,求其舉個例吖,好似西貢相思灣村土地亂象處處,村霸橫行無忌,本報發揮第四權,三度去信申訴署促徹查,地政總署、規劃署等部門卻互相卸責,搞到村民都要開大會聲討!所以高官講「勇於擔當」,特別哽耳!
高官仲話,檢視公務員高層職位嘅選拔聘任機制,並非表示現時嘅一批唔掂,認為現時嘅公務員團隊仍是專業高效,但未來需要符合多個條件,包括愛國愛港、忠誠、專業、高效、善於作為、敢於擔當、勤政為民,所以將來招聘公務員要加入測試國安法內容。
功夫茶又(手爪)晒頭,部分公務員的而且確有如和尚頭上嘅虱子──明擺着──唔掂,要考核篩選無可厚非,之但係上樑不正下樑歪,帶領公務員嘅司局長又有冇做好份工?好似話民望長期食泥墊「司」底嘅律政司司長鄭若驊,佢甫上任已醜聞纏身,本屆政府依家都就「收工」,但無論佔中或黑暴案嘅檢控速度,卻一直被批評龜爬蟻躝,擺明「霸住毛坑不拉矢」,阿哥,德不配位,職不稱能,距離「勇於擔當」可謂十萬八千里遠矣!
高官又形容過去政府一直打「守勢波」,每次推動新政策都有好多阻力和挑戰,未來公務機關需要喺機制上較以往更積極主動。功夫茶稱善!之不過,首務必先清除瘀血敗肉,把「忠誠嘅支薪廢物」掃地出門,公務員團隊才會再現生機,達至阿爺所講嘅「想幹事、會幹事、能幹事、幹成事」!
第一手消息請下載on.cc東網 iPhone/ iPad/ Android/
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500