政情：快必自詡「活火山」打風停工呻唔慣

快必嘅社交專頁日前分享呢個「拜山密語」，指自己還押超過一年，日日都有人探佢，「拜山」咁活躍就梗係「活火山」啦，之不過，冇人探訪嘅囚友就叫做「死火山」，好慘！目前還押於荔枝角收押所嘅快必話，同佢同一樓層有兩位仁兄，有一個叫亞橋、有一個叫阿鋒，兩個名加埋令佢聯想起武俠小說「天龍八部」嘅人物，於是每當佢哋兩個同時有人嚟「拜山」，快必就會大叫「橋鋒拜山」呀！同時會高唱上世紀80年代「萬水千山縱橫」呢首電視劇主題曲嚟賀吓佢哋。到底亞橋同阿鋒係指邊兩個呢？快必就冇開全名喇。

雖然快必話日日都有人探佢，但最近一星期打兩次風，咁啱又撞正係家人探訪嘅日子，都難免一嘗「死火山」嘅滋味喇。佢話打風嘅日子冇得「放風」，連黐信封嘅工作都停埋，面對突然多出嘅餘閒，唔鍾意躺平、又唔想瞓晏覺嘅快必話有啲唔慣，惟有喺監倉做sit up同拉筋，又或者睇吓書嚟消磨時間。