政情：黎梓恩失議席上擂台搵後路

黎梓恩今次參與嘅拳腳較量，係男子業餘組嘅K-1踢拳道（kickboxing）賽事。作為紅方嘅黎梓恩同藍衫嘅對手雖同屬64公斤級，但黎嘅身材明顯高出一截，加上現場有唔少觀眾為黎吶喊助威，聲勢上已經佔優。喺第一個回合，黎甫開始就直拳試探，然後右腳低掃，旋即施展猛攻壓制對手。

雖然擂台上黎嘅攻勢一浪接一浪，但對方就靈活閃避，不時瞄準黎嘅防守破綻出拳還擊且屢屢得手，後來更睇穿黎習慣用右方拳腳嘅傾向，多次以左手「撈腿」嚟化解黎嘅「膝撞」。有說「一寸長，一寸強」，較對手高出6厘米嘅黎始終佔上風。打完3個回合之後，黎以輕微嘅點數差距勝出，捧走獎盃。

過往拳賽戰績係「零」嘅黎梓恩，今次業餘拳賽所報嘅職業都仲係「區議員」喎，可能佢報名之時都無諗過自己會被DQ啦。話時話，只得29歲嘅黎梓恩既然未來5年都冇得參選，會唔會考慮轉換跑道，試吓做職業拳手呢？