政情：羅庭德「垂死掙扎」 舉侯志強戴耀廷合照

其實侯喺前晚已事先張揚話不滿港獨人士擔任北區區議會主席，仲會以流會等不合作態度應對會議。結果當尋日區會會議去到尾聲，侯等建制派再次提出臨時動議，指羅喺區議會首次會議嘅言論涉違《港區國安法》，要求羅辭職。羅先展示自己早前與侯嘅合照，話對方嘅指控令佢唏噓，跟住就舉起侯與香港大學法律系前副教授戴耀廷嘅合照「反擊」。

目睹羅有此一着，侯辯稱當時出席公開節目，又話「聽侯志強嘅說話，戴耀廷今日唔使坐監」，而過去同羅嘅合作係冒着「勾結黑暴嘅臭名」，但現時「第一個畀人擺上枱」。至於羅則強調自己區議員資格被認可，又問侯是否「叻過徐英偉？」及後侯仍想發表意見，但羅認為應表決議案，最終議案喺兩人「聲疊聲」中表決，並以7票贊成，3票反對下獲通過。