政情：削區會撥款權議程 民政局臨開會煞停

民政事務局局長徐英偉尋日出席立法會嘅相關委員會會議，就《施政報告》回應議員嘅提問。

根據立法會秘書處向委員會發出嘅文件指出，提到應政府當局要求同經由事務委員會主席梁志祥同意，該項議程項目中將唔會喺尋日舉行嘅政策簡報會及會議上討論。

有委員接受查詢時就話，唔知原來有關討論文件早上已被抽起，仲話事前局方曾希望議員喺會上可多就議題發言。而據佢了解，局方抽起文件係希望會議留番更多時間集中討論《施政報告》內容喎。

其實民政事務委員會早前已訂出討論區議會兩項撥款權力嘅議程，而喺最後一批、新界西5區議會上周五宣誓前，民政局就向立法會提交文件，話截至今個月4日，在任區議員總數已大減，其中中西區僅剩下3名議員，由於相當大比例嘅區議會議席懸空，現行兩項計劃嘅安排已經失效。

當局仲話由剩低極少數區議員決定撥款，安排有欠公允。為確保公帑運用得宜，當局建議暫停區議會擔當嗰兩項撥款嘅角色，改為由民政總署、民政處同康文署代行。政府當時更否認收權，強調區議會只是諮詢架構，給予該等撥款權力只是出於尊重。政府同時又指區議會已殘缺不全，由政府負責批撥款只係收拾殘局。但講真，政府撥款申請程序冗長，由政府部門審批申請又係咪一個有效方法，都真係要拭目以待。

雖則話唔討論呢個議程，但委員會主席梁志祥亦喺會上話，政府已撥款畀區議會部分項目，但大量區議員辭職或被取消議員資格，令唔少區議會未能運作，關注當局將會點確保市民能受惠於政府嘅地區資源。徐就重申區議會係地區諮詢組織，承認的確有部分議會人數不足，政府未來會再探討區議會嘅路向，但強調民政總署將繼續確保市民嘅地區服務唔會受到影響。