政情：養寵物責任大 麥美娟搵定朋友「託孤」

麥美娟目前係兩隻狗狗嘅主人。佢話無論貓狗，只要同人類一齊生活，就已經視彼此為一家人。佢仲自爆話，已經物色定一兩個愛狗嘅朋友，若果一旦唔好彩遇上意外不測之類，就要幫手照顧佢嘅寵物，話身為主人始終都要做好交帶喎。

雖然麥美娟好寵愛兩隻狗狗，但佢就話冇諗過帶寵物遊埠觀光，因為狗狗未必知道去緊旅行，況且寵物要入境他邦，必須通過嚴格嘅檢疫要求，搭飛機嘅費用又相當昂貴。麥美娟話有一次佢隨立法會到北歐訪問，因時差關係唔能夠好似到內地出差咁，透過手機視像同兩隻狗狗隔空見面。後來訪問結束返港，家人帶同兩隻狗狗到機場接機，其中一隻狗狗一見面就發脾氣，對住佢擰歪面、唔理睬，搞到佢當晚要同狗狗道歉啊。