政情：話要瞓番夠 在囚趙恩來愛早抖

趙恩來喺信中提到，上個月法庭嘅判決雖然係意料之內，但要喺監獄呢個陌生嘅地方生活至少半年，難免需要時間適應。之不過相較於其他還押待審嘅人，知道自己服刑時間都叫做有個目標，能夠預期到咗某個日子可再呼吸牆外空氣，已算係非常幸運喎！而失去自由嘅在囚生活，每天諗住點樣度過漫長嘅日與夜，惟有靠閱報、睇書嚟消磨時間。

講到呢度，佢就指最近有位素未謀面嘅中學小師妹，每日剪報寄去獄中，畀佢有多啲文字可讀，佢感謝牆外小夥伴嘅支援，畀佢喺與世隔絕嘅日子，毋須擔憂牆外事情，得以安心度過每一長夜，而一到晚上回倉佢都會早啲入睡，話要補番之前喺外面缺少嘅睡眠喎。