昔日東方政情：何偉霖貼文 數陳振哲「煩」人
政府日前宣布新界東共有16位區議員宣誓無效，即時褫奪佢哋嘅議席，當中包括綽號「機場大叔」嘅大埔區議員陳振哲。至於通過宣誓嘅同區區議員何偉霖，就喺社交平台貼文，指陳振哲有着過人嘅執念、好煩、惹來區議會內部分同事嘅憎惡，不過就好過某啲心裏面想你出事嘅所謂「同事」囉！
雖過火 亦好過某啲「同事」
何偉霖話陳振哲永遠「煩」得令人火大，對所有規例、條例、規則、細節有着過人嘅執念，亦因而經常拖長會議時間，同埋會就觀點睇法同你爭論得沒完沒了，不但令區議會部分同事心感憎惡，唔少官員亦覺得陳係一個令人頭痛嘅存在！而何話自己都係其中一個「受害者」，有幾次不論會議或私下都同陳爭拗得面紅耳赤，不歡而散！
之不過，批評完陳振哲，何又提到，話陳未必一定會啱晒，有時候亦會過火，但總比一啲自以為有資歷、有經驗、口講對事不對人、但喺外面招搖撞騙嘅議員來得實在喎！至於有官非在身嘅議員同事，陳亦會上庭旁聽等。比起某啲同事上庭連一句關心問候都冇，下下為自己利益盤算，心入面想你出事嘅所謂「同事」，實在無可比擬咁話。究竟何偉霖講緊邊個呀？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
