政情：傾盆黑雨 打斷渣馬記者會

點解內會同財委會只係相隔半個鐘，前者要取消後者就唔使呢？財委會主席陳健波（波哥）解釋，規矩係會議進行前兩個鐘，天文台發出黑雨警告信號先至要取消。由於天文台喺12點45分改發紅雨，距離財委會舉行時間超過兩個鐘，所以會議毋須取消。波哥又話財委會尋日要合共審批約100億元嘅撥款，加上佢已經向議員發出會議如期進行嘅通知，亦知道唔少議員都已經到咗立法會，所以都係會照開喇。

暴雨不但導致立法會內會取消，連將於本月底復辦嘅渣打香港馬拉松，尋日喺維園網球場貴賓室所舉行嘅記者會亦一度中斷。話說記者會開始之時，天氣已經好唔穩定，而當記者會進行到一半就遇上「黑雨」，儘管場地屬「有瓦遮頭」，但滂沱大雨加上排水管道不暢，夾雜着垃圾同「小強」嘅污水由渠口倒灌而出，四方八面咁湧入位處低窪嘅貴賓室！唔少記者要跳上枱面躲避。而活動主辦方、香港田徑總會主席關祺等人同一眾記者涉水步出貴賓室，到室外簷篷底繼續進行記者會。