政情：官文又長又譖陳健波睇到火滾叫公僕學好中文

中文係絕大部分港人嘅第一語言，政府各種以中文發表嘅訊息應該一睇就明，但事實係唔少官方文章如公告或指引，繁複難懂。保險界議員陳健波（波哥）尋日喺立法會批評政府發布訊息方式守舊，發出嘅中文訊息行文有問題，市民難以明白。特首林鄭月娥就直接承認文宣工作係政府嘅弱項，希望團隊一齊多睇書，並要求公務員事務局局長聶德權將中文課程納入公務員學院。

直接翻譯英文根本睇唔明

波哥直指政府發布訊息中文行文方式有問題、篇幅太長，又話唔少中文指引係由英文直接翻譯，尤其係有關法律嘅條文根本就睇唔明，仲話市民最熟悉嘅文字始終係中文，質疑政府點樣令市民明白政策條文呢？

林鄭就話政府團隊都一把年紀喇，難以重新學習，況且語文能力係需要由細建立，期望教師對下一代做好價值觀、語文、理解能力嘅培訓。佢又鼓勵政府團隊要多睇書，又話佢任內5份《施政報告》都係用中文草擬，承認文宣工作對政府影響好大，然而相關工作的確係政府弱項，希望團隊一齊努力提升中文語文能力。

但波哥就好似唔收貨喎。佢回覆查詢時話，林鄭承諾提升公務員學院嘅中文課程，只可以發揮一部分作用，最重要係點樣加強溝通工作，並非局限於改善語文能力，核心在於「如何傳達訊息」。佢進一步解釋話，好多時政府發出嘅指引「太過保護自己」，搞到成件事變得模棱兩可，市民睇完之後都一臉茫然，但最弊嘅係，去查閱指引嘅市民先係最需要幫助嘅人，但指引反而令人一頭霧水添！

「貼地啲」寫完搵市民做測試

波哥又認為，與其呼籲公僕睇多啲中文書、將中文課程納入公務員學院，不如試吓佢建議嘅方法，就係政府寫完指引、政策等文本之後，貼地啲搵一位完全唔知道內容嘅市民去閱讀，測試過後自然得知普通市民睇唔睇得明啲文本。

佢仲話香港往後同內地嘅交流會更加頻繁，社會必然會強調中文應用，希望政府要認真考慮吓點樣改進喇。