政情：施政報告 悶到暈 高官議員瞌眼瞓

政府發表《施政報告》喺朝早11點開始，全體議員同多個政策局嘅局長坐喺立法會會議廳，而商經局副局長陳百里、財庫局副局長陳浩濂同局長政治助理葉俊廉、就坐喺樓上嘅公眾席，而佢哋旁邊就係幾位行政會議非官守成員以及外國駐港領事。

唯一嘅非建制派議員陳沛然雖然遲到，反而一早較腳走人。當《施政報告》讀咗大約一個鐘之後，有議員看似魂遊太虛，唔少人攞起手機打發時間。張宇人就徘徊於清醒與睡夢之間，雙眼不時合上耷吓耷吓，議員田北辰都閉目養神，而議員蔣麗芸似乎都無法專注，舉頭望住天花板，好似仰天長嘆咁款。議員黃定光就猛咁捽眼，好似想叫自己堅持落去，不過其後都疑似敗陣，而佢隔籬嘅議員何俊賢就拍拍佢膊頭，唔知係咪想叫醒黃定光呢？

至於勞福局局長羅致光雙眼眼皮就好似灌咗鉛咁，重到睜唔開。作為問責官員，羅致光被鏡頭捕捉到佢瞌眼瞓，都唔係第一次啦，喺今年2月宣布《財政預算案》，喺預算案讀咗一個鐘後，佢已經開始進入瞌吓醒吓嘅狀態，多次被傳媒捕捉到佢「釣魚」。