政情：立會外水馬移除 林健鋒興奮「打卡」

呢幾日立法會外圍嘅水馬陸續移走，包括夏慤道、立法會道、添美道、龍和道、中信橋同龍匯道中信大廈嘅水馬喺尋晚半夜已全部搬走晒；俗稱「煲底」範圍同地下入口附近嘅幾十個水馬，喺尋日清晨近5點半都搬走咗。

立法會秘書處話立法會廣場已重新開放，而位於「煲底」嘅議員入口1亦都重新開放畀持有立法會長期通行證嘅人士使用。只不過，礙於疫情關係，所有公眾導賞同教育活動仍未重開，公眾入口1會維持關閉，另外示威區喺今屆任期內亦都唔會開放。

議員林健鋒尋日特登去「打卡」，感受一下冇水馬阻隔嘅清新氣息。佢又好開心咁講，立法會周圍冇晒水馬象徵咗香港已恢復安全同穩定嘅面貌，並希望香港經濟都可以盡快重回正軌。