政情：李家超警校返家 阿媽唔認得

李家超日前同中學生交流，傾偈時就同年輕人大爆秘密，原來佢小時候身體孱弱，但後來投考警隊，喺學堂訓練咗兩個月，又步操、又攀山，放假返到屋企，佢媽媽就話唔認得佢，「砰」一聲關埋門，仲反問佢係邊個添！佢就同媽媽講「我係你個仔啊」，佢媽媽先話「聽落把聲又似似哋喎」，先至開門畀佢咋！

由於面對面交流時間得一日，佢要將自己60幾年嘅經歷，濃縮至好短嘅時間話畀年輕人知都唔容易o架，不過佢覺得年輕人完全吸收得到，稱讚年輕人充滿活力、希望同埋能量，所以當佢退休嗰陣都可以安享晚年。

佢又鼓勵年輕人，要堅信自己有能力去應付問題，唔好低估自己嘅能力，最重要嘅係如果遇上解決唔到嘅問題，就切記要搵其他人傾訴喇！佢又指「態度決定成敗」，人生唔係一個死胡同嚟嘅，希望年輕人可以嘗試多啲唔同嘅事物啦！