政情：辭任區議員 趙柱幫轉行撈地產

早幾日趙柱幫喺社交平台貼文，指自己喺7月初辭職，無幾耐就喺屋企人介紹下，投身於從來無做過，兼且係自己比較抗拒嘅職業。但由於佢要處理結束議員辦事處嘅手尾，無奈之下惟有靠新工作嘅工時彈性及僅有嘅底薪嚟支撐生計。後來趙於8月中順利通過考試，9月初申請牌照，依家終於拎到牌啦。不過趙又提到自己畢業後就從事社福工作，仲未習慣新工。

雖已辭任區議員，但趙柱幫份新工依然係主打沙田區，話如果有朋友需要買賣樓宇、租樓都可以搵佢，仲話一定會向相熟朋友畀盡佣金折扣。佢亦戴定頭盔話，大家搵得佢嘅都係自己人，保證唔會硬銷，話從來唔鍾意勉強人。不過為兩餐，睇嚟佢都要勉強自己頂硬上啦。