政情：江旻憓膺傑青承諾再創佳績

每年一度嘅十大傑出青年選舉尋日公布結果。今年獲得殊榮嘅青年俊彥共有7位，分別係女子劍擊（重劍）運動員江旻憓、相達生物科技行政總裁招彥燾、香港管弦樂團駐團指揮廖國敏、香港中文大學醫學院外科學系助理教授張源津、金記控股有限公司主席徐汶緯、香港大學李嘉誠醫學院臨床腫瘤學系臨床副教授林嘉安，以及律師簡汝謙。

今年共7人獲殊榮

雖然好多人都寄望江旻憓能代表香港奪得更多獎牌，但佢坦言自己曾3次令家人失望，譬如唔依家人意願學跳芭蕾舞、曾於訓練時膝頭受傷、以及未能於奧運中摘下獎牌。但佢仍多謝團隊嘅支持，家人嘅鼓勵同諒解令佢不斷進步，承諾會繼續努力再創佳績，更呼籲市民要多做運動。

本身係律師嘅簡汝謙則希望推廣客家文化，稱單靠自身力量較為薄弱，但得到新界鄉議局等支持，或尋求更多合作，畀市民加深認識客家文化。出身草根嘅林嘉安醫生則希望教育公眾了解腫瘤知識，認為今次得獎亦唔會改變自身嘅工作軌迹。作為首位華人擔任美國費城樂團助理指揮嘅廖國敏，話佢喺美國唔會擔心華人身份會影響自己，反而更勤奮、努力咁證明自己較其他人有更高嘅能力。