昔日東方政情：田北辰探劏房戶 送8包米夠實際
趁公眾假期，議員田北辰（田二少）尋日聯同香港社區組織協會成員，到荃灣探訪8個劏房戶。為免「兩梳蕉」咁登堂入室，佢專程抬咗8包米送畀有關家庭。佢話「食米要知米貴，住屋要知租貴」，如果劏房租金可以下調，就可以減輕基層嘅生活負擔，所以劏房租管必須配合起始租金咁話。
點解今次探訪會選擇送米呢？田二少話知道好多租戶平時一日三餐都係自己煮，免得過都唔會外出食飯，間中一次慶祝生日出去食咗幾百蚊，都會肉痛好耐，所以送米會比較實際。而佢今次就用咗1,000蚊買米，另外又送書券畀小朋友，等佢哋放假行吓書店，買鍾意嘅書同文具。
重申租管要配合起始租金
田二少又話更實際嘅係政策點樣幫到佢哋。由於普遍租戶現時租金佔收入四至五成，如果租金下調幾百至一千，已可減輕生活負擔，間唔中出街食餐飯都無咁肉赤啦。所以田二少重申，推租務管制，必須配合起始租金，否則形同虛設。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
