政情：一字排開踏步三跑 9議員化身猛龍特警隊

議員盧偉國喺社交網站分享短片，9位議員喺跑道上「慢鏡」走向鏡頭，盧話大家一字排開、展開大步，有啲猛龍特警隊嘅感覺，仲寫上「龍咁威，特種警衞，威猛我真勇毅」嘅歌詞。當中仲見到委員會主席張華峰特別投入，當就嚟走到鏡頭面前，仲舉高隻手，好威水咁啊！

盧偉國話議員首先喺機場行政大樓頂層露台俯瞰機場工程，聽取機場管理局介紹工程進展以及未來發展大計，點樣從「城市機場」打造為「機場城市」，點樣為香港同大灣區內地城市帶嚟協同效益等。其後一行人坐船前往三跑填海工地，視察啱啱完成路面鋪設嘅第三條跑道，了解基建設施嘅進度，包括滑行道嘅鋪設工程。而第三條跑道將按原定計劃喺2022年啟用，整個三跑系統就喺2024年啟用。