政情：預咗變獄友 吳文遠拍定片為朱凱廸賀壽

吳喺影片中話當大家睇到條片嗰陣，相信佢同埋朱都已經身在牢獄。吳話同朱已認識好耐，仲憶起朱當年爭取保留皇后碼頭時，自己仍然係着住套老西喺中環返工，放工後就去探吓班留守人士，仲話自己係喺反高鐵運動嘅時候先至全程投入社運，當時佢同朱並唔熟悉，亦冇乜合作。

吳又自爆到最近先知道朱嘅年齡原來係細過自己，事關朱已經成家立室，有老婆仔女，又參與社會運動好長時間，所以吳一直以嚟都以為朱年紀大啲。佢又形容朱「仔細老婆嫩」，希望朱能盡早獲釋，一家團聚。